“Integrated Energy BV SPV”, shoqëria që mban koncesionin e incineratorit të Tiranës, ka regjistruar një fitim para taksave prej 792.3 milionë lekësh gjatë vitit 2025, që korrespondon me mbi 8 milionë euro. Rezultati vjen pavarësisht faktit se impianti i incinerimit, i parashikuar në kontratën origjinale, nuk është ndërtuar deri më sot.

Sipas pasqyrave financiare, të ardhurat nga aktiviteti kryesor arritën në 1.5 miliardë lekë, të gjeneruara nga trajtimi i rreth 492.935 tonëve mbetje nga bashkitë e qarkut dhe operatorë privatë. Fitimi para tatimit zinte 53% të totalit të të ardhurave, normë e konsideruar jashtëzakonisht e lartë për një kontratë të financuar kryesisht nga fondet publike. Pas pagesës së tatimit prej 119.6 milionë lekësh, fitimi neto arriti në 672.8 milionë lekë.

Shoqëria ndodhet nën sekuestro preventive që prej korrikut 2023 dhe administrohet nga shteti. Që nga viti 2017, ajo ka përfituar gjithsej 8.4 miliardë lekë nga buxheti shtetëror, duke përfshirë tarifën e plotë prej 29 eurosh për ton, e cila parashikonte edhe incinerimin, proces ky që nuk është kryer asnjëherë. Në korrik 2026, SPAK dërgoi për gjykim 12 persona dhe dy shoqëri, ndër të cilat edhe “Integrated Energy BV SPV”, e akuzuar për mashtrim me pasoja të rënda dhe pastrim parash.

Foto: Jan Huber / Unsplash