Ligji i faljes së detyrimeve po zbatohet gjithashtu nga pushteti vendor, duke u shtuar kështu masave tashmë në fuqi në fushën e tatimeve dhe doganave. Në Tiranë, Drejtoria e Përgjithshme e Taksave dhe Tarifave e Bashkisë ka bërë publike të dhënat sipas të cilave, deri tani, 343 subjekte kanë përfituar nga kjo skemë për detyrimet e periudhës 2015–2019.

Sipas udhëzimit të publikuar nga bashkia, detyrimet e papaguara deri më 31 dhjetor 2014 fshihen automatikisht, pa kërkuar asnjë veprim nga debitorët. Për periudhën 2015–2019, bizneset mund të zgjedhin ndërmjet dy alternativave: pagesën e 50% të principalit deri më 30 qershor 2026, ose pagesën e 75% të tij deri më 31 dhjetor 2026. Në të dyja rastet, gjobat dhe kamatëvonesat falen plotësisht. Për detyrimet e periudhës 2020–2024, kërkohet shlyerja e plotë e principalit, ndërsa gjobat dhe kamatëvonesat falen automatikisht.

Për të përfituar nga ky lehtësim, subjektet duhet të plotësojnë disa kushte kryesore: të mos jenë në proces penal në fushën tatimore ose doganore, të mos kenë proces aktiv ankimor administrativ dhe të mos kenë iniciuar procese gjyqësore ndaj administratës tatimore.

Foto: Kelly Sikkema / Unsplash