Gjatë vitit 2025, Gjykata Kushtetuese e Kosovës është shndërruar në adresën kryesore për zgjidhjen e ngërçeve institucionale, duke nxjerrë katër aktgjykime brenda tetë muajsh lidhur me konstituimin e Kuvendit. Sot, historia rrezikon të përsëritet, ndërsa procesi i nisur më 6 gusht mbetet i papërfunduar.

Afati kushtetues prej 30 ditësh, i përcaktuar nga aktgjykimi i Kushtetueses i 26 qershorit, skadoi më 7 gusht, pa asnjë pasojë juridike të parashikuar shprehimisht. LVV-ja kërkon kohë shtesë deri më 6 shtator, duke llogaritur afatin nga dita e hapjes së seancës, ndërsa partitë opozitare insistojnë në respektimin e afateve kushtetuese.

Ekspertë juridikë të pyetur nga Radio Evropa e Lirë bien dakord se Gjykata Kushtetuese ka kompetenca të kufizuara për t’i dhënë zgjidhje krizës aktuale. Sipas tyre, ajo mund të interpretojë Kushtetutën, por nuk mund të krijojë norma të reja apo të imponojë pasoja që teksti kushtetues nuk i përmban. Bllokada politike, theksojnë ata, nuk mund të zgjidhet duke ia transferuar përgjegjësinë gjykatës.

Fjala e fundit, duket, u takon 120 deputetëve dhe vullnetit të partive për të gjetur marrëveshje.

Foto: Hansjörg Keller / Unsplash