Një zjarr i fuqishëm ka shpërthyer mesditën e sotme në masivin pyjor të fshatit Lugaxhi, që bën pjesë në Njësinë Administrative Labinot Mal, Bashkia Elbasan. Rënia e zjarrit është raportuar rreth orës 13:00 nga banorët e zonës, të cilët njoftuan menjëherë shërbimin zjarrfikës të bashkisë.

Flakët kanë përfshirë një sipërfaqe të gjerë pylli, duke krijuar shqetësim të shtuar për shkak të drejtimit të avancimit të tyre drejt zonës së banuar. Menjëherë pas njoftimit, u mobilizuan forcat zjarrfikëse, strukturat e mbrojtjes civile dhe komuniteti vendor për të frenuar përhapjen e zjarrit dhe mbrojtur banesat e zonës.

Ndërhyrja po rezulton e vështirë për shkak të terrenit malor dhe sipërfaqes së konsiderueshme të përfshirë nga zjarri. Shërbimi zjarrfikës i Elbasanit ka qenë i angazhuar intensivisht në ditët e fundit, duke organizuar strukturat e tij në dy zona të ndryshme të bashkisë për t’u përgjigjur sa më shpejt çdo situate emergjente.

Deri tani nuk raportohen të lënduar. Operacioni për izolimin e vatrave dhe shuarjen e flakëve vijon, ndërsa autoritetet u kërkojnë banorëve të qëndrojnë të qetë dhe të ndjekin udhëzimet e strukturave të emergjencës.

Foto: Matt Palmer / Unsplash