Një shpërthim i fortë ka goditur zonën industriale të portit të Roterdamit në Holandë, duke shkaktuar vdekjen e të paktën një personi dhe plagosjen e disa të tjerëve. Incidenti ka vënë në lëvizje të gjitha shërbimet e emergjencës, ndërsa policia ka shpallur zonën të mbyllur dhe ka hapur një hetim zyrtar për zbardhjen e rrethanave.

Sipas zëdhënësit të policisë së Roterdamit, shpërthimi ka ndodhur në rrugën “Moezelweg” rreth orës 11:30 të paradites. Forcat e rendit kanë izoluar menjëherë vendngjarjen, duke hapur rrugën për ndërhyrjen e ekipeve mjekësore dhe specialistëve të sigurisë.

Paralelisht me këtë ngjarje, kompania Gunvor Energy, e cila operon rezervuarë për ruajtjen e produkteve të naftës në të njëjtën zonë, raportoi një incident të veçantë gjatë punimeve të mirëmbajtjes, ku disa punonjës mbetën të lënduar.

Mediat vendase dhe agjencia Reuters raportojnë gjithashtu për ndërprerje të energjisë elektrike në zonën portuale. Autoritetet po hetojnë me prioritet nëse ndërprerjet e energjisë janë të lidhura drejtpërdrejt me shpërthimin, ndërsa situata në terren vazhdon të monitorohet nga afër.

Foto: Antonio Batinić / Pexels