Kompania zvicerane MABCO Constructions ka kundërshtuar zyrtarisht vendimin e Ministrisë së Infrastrukturës dhe Energjisë për ndërprerjen e parakohshme të kontratës së koncesionit për Aeroportin Ndërkombëtar të Vlorës, duke i kërkuar qeverisë shqiptare nisjen e negociatave në mirëbesim për zgjidhjen e mosmarrëveshjes.

Në një shkresë të depozituar më 10 gusht 2026, MABCO e cilëson vendimin e ministrisë si të “pabazuar” dhe argumenton se vonesat në përfundimin e projektit nuk mund t’i atribuohen investitorit, por janë shkaktuar ose rënduar nga veprimet dhe mosveprimet e institucioneve shqiptare. Ndër të tjera, kompania pretendon se rreth 200 punonjës dhe specialistë të saj u penguan të hynin në kantier më 18 dhe 19 maj 2026, ndonëse efektivë policorë ndodheshin fizikisht në zonë.

MABCO kundërshton gjithashtu argumentin e ministrisë lidhur me sigurimin e kontratës dhe penalitetet, duke pretenduar se kontrata parashikon një afat 60-ditor për korrigjimin e shkeljeve, afat i cili nuk kishte përfunduar kur u njoftua zgjidhja. Kompania rezervon shprehimisht të gjitha të drejtat juridike, duke përfshirë mundësinë e arbitrazhit ndërkombëtar, nëse negociatat dështojnë.

Foto: Curtis Cheng / Pexels