Shqipëria po ndërton një kuadër të ri ligjor për prokurimet në fushën e mbrojtjes dhe sigurisë, që do të zëvendësojë ligjin aktual të vitit 2020. Ndryshimet janë aq të thella sa prekin më shumë se gjysmën e përmbajtjes ekzistuese, duke e bërë të pamjaftueshme çdo ndërhyrje me amendime.

Projektligji është hartuar duke marrë parasysh komentet e Komisionit Europian dhe vlerësimet e SIGMA-s, të cilat kishin konstatuar se legjislacioni shqiptar ishte vetëm pjesërisht i harmonizuar me Direktivën europiane 2009/81/KE. Ndryshimet prekin një gamë të gjerë çështjesh, duke filluar nga kushtet e përjashtimit nga procedurat standarde, deri te mekanizmat e ankimit dhe pavlefshmëria e kontratave.

Një nga risitë kryesore është heqja e përjashtimeve të përgjithshme, si ato për prokurimet nëpërmjet agjencive të NATO-s, blerjen e pajisjeve ushtarake apo situatat e krizave. Pajisjet ushtarake do të trajtohen si pjesë e objektit kryesor të ligjit.

Projektligji fut gjithashtu një procedurë të thjeshtuar për kontratat me vlerë të ulët, zgjeron afatin e marrëveshjeve kuadër deri në shtatë vjet dhe forcon të drejtën e operatorëve ekonomikë për të ankimuar vendimin e autoritetit kontraktor për anulimin e procedurave.

Ligji i ri, i përbërë nga 80 nene, do të hyjë në fuqi gjashtë muaj pas miratimit.

Foto: Brett Jordan / Unsplash