Operatori i Sistemit të Shpërndarjes (OSSH) ka rishikuar ndjeshëm planin e tij të investimeve për vitet 2026 dhe 2027, duke ulur buxhetin total me rreth 5.9 miliardë lekë. Sipas dokumenteve të dërguara Entit Rregullator të Energjisë, reduktimi më i madh bie mbi vitin 2027, ku investimet e planifikuara kalojnë nga rreth 12.45 miliardë lekë në vetëm 7.17 miliardë lekë, duke shënuar një ulje prej afërsisht 5.28 miliardë lekësh. Për vitin 2026, diferenca është më e moderuar, me planin që kalon nga 9.07 miliardë në 8.46 miliardë lekë.

OSSH shpjegon se rishikimi është pjesë e procesit të rregullt të përditësimit të planit pesëvjeçar të zhvillimit të rrjetit për periudhën 2023-2027. Operatori thekson se ndryshimet pasqyrojnë ecurinë reale të projekteve, mundësitë konkrete të zbatimit, si dhe kursimet e arritura gjatë procedurave të prokurimit. Sipas kompanisë, jo të gjitha investimet janë hequr nga programi; një pjesë e tyre janë zhvendosur në vite të tjera, ndërsa disa projekte janë riformuluar bazuar në koston dhe fazën e zbatimit. OSSH siguron se objektivat për zhvillimin dhe përmirësimin e sistemit të shpërndarjes mbeten të pandryshuara.

Foto: Matthew Henry / Unsplash