Çmimet e hoteleve në disa destinacione europiane kanë shënuar rritje të ndjeshme në prag të eklipsit total të Diellit të 12 gushtit 2026, ndërsa mijëra turistë planifikojnë të udhëtojnë drejt Islandës dhe Spanjës për të ndjekur një ndër ngjarjet astronomike më të rralla të dekadave të fundit.

Në Reykjavik, çmimi mesatar i një dhome hoteli për periudhën e eklipsit ka kaluar shifrën prej 1,000 dollarësh për natë, duke shënuar rritje mbi 140% krahasuar me nivelet normale, sipas të dhënave të kompanisë Lighthouse. Edhe në Spanjë presioni mbi akomodimin është i lartë, veçanërisht përgjatë trajektores ku eklipsi do të jetë total. Në Asturias, rezervimet për periudhën 10–12 gusht janë 76% më të larta se një vit më parë, ndërsa tarifat mesatare janë rritur me 85%. Në A Coruña rezervimet janë shtuar me 65%, ndërsa çmimet me 41%.

Autoritetet spanjolle presin rreth 6 milionë vizitorë në zonat e vrojtueshme, duke mobilizuar mbi 35 mijë punonjës të forcave të sigurisë. Një studim i Airbnb vlerëson se vizitorët mund të gjenerojnë rreth 362 milionë euro shpenzime në Spanjë gjatë asaj jave. Fenomeni po shfrytëzohet gjithashtu për të devijuar turizmin drejt rajoneve të brendshme, larg destinacioneve mesdhetare të mbingarkuara.

Foto: Israel Torres / Pexels