Kryetari i Partisë Demokratike, Sali Berisha, shprehu sot keqardhjen e tij për deklaratën e presidentit ukrainas Volodymyr Zelensky, i cili gjatë vizitës në Beograd u shpreh se Ukraina nuk e njeh pavarësinë e Kosovës, duke e cilësuar atë si të njëanshme.

Berisha e quajti këtë qëndrim “krejtësisht të papranueshëm” dhe “fatkeq”, duke argumentuar se ai bie ndesh me vendimet e NATO-s, me Planin e Ahtisarit të miratuar nga OKB-ja, si dhe me interpretimin e Gjykatës Ndërkombëtare të OKB-së, e cila ka konfirmuar legjitimitetin e pavarësisë së Kosovës.

Sipas kreut të PD-së, deklarata e Zelenskyit është gjithashtu jashtë çdo konteksti historik, duke pasur parasysh se shqiptarët kanë qenë ndër mbështetësit më të fortë të Ukrainës në luftën e saj kundër agresionit rus. Berisha nënvizoi se Serbia, në kontrast të plotë, ka luajtur historikisht rolin e një mbështetësi të Rusisë në Ballkan. Për këto arsye, demokratët e konsiderojnë qëndrimin e presidentit ukrainas si një deklaratë që nuk duhej bërë kurrë dhe që dëmton interesat e vetë Ukrainës.