Kodi Rrugor i Shqipërisë ka pësuar ndryshime të rëndësishme, të cilat kanë hyrë në fuqi më 7 gusht 2026, duke parashikuar masa më të ashpra ndaj shkelësve të rregullave të qarkullimit. Drejtori i Policisë Rrugore, Perlat Vatoci, bëri publike ndryshimet kryesore, duke theksuar se synimi i tyre është rritja e sigurisë rrugore dhe ulja e aksidenteve.

Ndër masat më të rëndësishme, personi i kapur duke drejtuar mjet pa leje do të humbasë të drejtën për ta marrë atë deri në një vit, ndërsa për të miturit kjo periudhë zgjatet në dy vjet. Një tjetër ndryshim i rëndësishëm është heqja përfundimtare e lejes së drejtimit për ata që kapen për herë të dytë duke drejtuar mjet nën ndikimin e alkoolit mbi 0.5 g/l. Gjithashtu, gjobat për sjellje të rrezikshme në rrugë janë rritur nga 20 000 në 60 000 lekë, ndërsa përdorimi i telefonit celular ndalohet edhe për drejtuesit e biçikletave dhe motoçikletave deri në 50 cc.

Hiqet gjithashtu mundësia e konvertimit të pezullimit të lejes me pagesë. Vatoci nënvizoi se qëllimi kryesor mbetet parandalimi i aksidenteve dhe mbrojtja e jetës, duke u bërë thirrje drejtuesve të mjeteve të respektojnë rregullat e qarkullimit.