Dy kompani shtetërore që operojnë në shërbime publike esenciale, “Ujësjellës Kanalizime Tiranë” dhe “Identitek”, prodhuesja e dokumenteve të identitetit, kanë shënuar fitime të konsiderueshme në vitin 2025, duke ngritur pyetje rreth balancës mes përfitimit financiar dhe interesit të konsumatorëve.

UKT raportoi të ardhura prej 4.5 miliardë lekësh, me një fitim para taksave prej 1.5 miliardë lekësh, që shënon rritje prej gati 30% krahasuar me vitin paraardhës. Norma e fitimit prej 33% vjen ndërkohë që kompania ende nuk ka arritur të garantojë furnizim me ujë 24 orë në ditë, objektiv i premtuar qysh kur tarifat u rritën me 44% në vitin 2018. Sipas të dhënave zyrtare të Entit Rregullator të Ujit, furnizimi mesatar mbetet vetëm 17 orë në ditë.

“Identitek” raportoi fitim prej 1.8 miliardë lekësh nga të ardhura totale prej 3.5 miliardë lekësh, duke regjistruar normën më të lartë të kthimit prej 51%. Shqiptarët paguajnë ndërkohë çmimet më të larta në rajon për dokumentet biometrike, duke arritur deri në 180 euro për pasaportë me afat të përshpejtuar.

Së bashku, të dy kompanitë gjeneruan rreth 35 milionë euro fitime vetëm gjatë vitit 2025.