Drejtori i Përgjithshëm i Burgjeve, Adriatik Kupi, ka mbledhur Komisionin e Disiplinës për të shqyrtuar ngjarjen e rëndë të regjistruar brenda ambienteve të burgut të Fierit. Në fokus të kësaj mbledhjeje janë masat disiplinore të propozuara nga vetë institucioni i vuajtjes së dënimit, i cili ka rekomanduar largimin nga detyra të gjashtë efektivëve, ndërsa për dy të tjerë është sugjeruar pezullimi i përkohshëm. Edhe të burgosurit e përfshirë në konflikt do të përballen me pasoja, pasi ndaj tyre është propozuar një masë shtesë disiplinore me kohëzgjatje tre mujore.

Paralelisht me procedurat administrative, Prokuroria e Fierit ka nisur hetimet për të sqaruar rrethanat e sakta të ngjarjes. Investigimi synon të përcaktojë nëse bëhet fjalë për një përplasje spontane apo për një ngjarje të planifikuar dhe të porositur paraprakisht. Në kuadër të procedimit penal, hetuesit kanë marrë në pyetje Denis Bajrin, i cili ka dhënë dëshminë e tij. Sipas tij, dy të burgosurit Gjini dhe Zoto e kanë thirrur fillimisht dhe më pas e kanë sulmuar me objekte prerëse të improvizuara. Hetimi është ende në vazhdim.