Dy persona shpëtuan nga mbytja në det në plazhin e Velipojës, pas ndërhyrjes së shpejtë të efektivëve të Policisë Kufitare të Shkodrës. Ngjarja ndodhi gjatë operacioneve të monitorimit të vijës bregdetare, që Drejtoria Vendore për Kufirin dhe Migracionin Shkodër kryen me dronë dhe mjete lundruese me qëllim garantimin e sigurisë së pushuesve gjatë sezonit veror.

Gjatë patrullimit rutinor, punonjësit e policisë vunë re dy shtetas që ndodheshin në situatë kritike dhe rrezikonin të mbyteshin. Reagimi ishte i menjëhershëm: ekipet e Policisë Kufitare u nisën me mjete lundruese Jet Ski dhe arritën t’i nxirrnin të dy personat në siguri pa lëndime të raportuara.

Të shpëtuarit u identifikuan si M. P., 67 vjeç, me banim në Burrel, dhe Z. N., 41 vjeç, banues në Velipojë.

Policia Kufitare thekson se monitorimi i vijës bregdetare vazhdon me intensitet të plotë dhe njësitë janë në gatishmëri të vazhdueshme për çdo situatë emergjente. Autoritetet u bëjnë thirrje qytetarëve që, në rast rreziku ose vërejtjes së situatave të dyshimta në det, të kontaktojnë menjëherë numrin pa pagesë 112.