Partia qeverisëse Tisza në Hungari ka nominuar Andras Baka, ish-kryetar i Gjykatës Supreme, si kandidat për president të vendit. Baka u largua nga ky post në vitin 2012 nga qeveria e Viktor Orbanit, pasi kishte kritikuar publikisht reformat e saj në drejtësi. Nominimi u njoftua nga kryeministri Peter Magyar dhe vjen si pjesë e një serie ndryshimesh që qeveria e re ka nisur me qëllim riorganizimin e institucioneve shtetërore dhe dobësimin e ndikimit të Orbanit mbi to.

Tisza fitoi bindshëm zgjedhjet parlamentare të prillit, duke i dhënë fund 16 viteve të dominimit të Fidesz. Disa javë më parë, parlamenti hungarez largoi nga detyra presidentin Tamas Sulyok, i zgjedhur gjatë periudhës së Orbanit, duke hapur rrugën për kandidaturën e Bakës. Ai pritet të zgjidhet president të martën, pasi Tisza kontrollon shumicën kushtetuese.

Me karrierë të gjatë ndërkombëtare, Baka shërbeu si gjyqtar në Gjykatën Evropiane të të Drejtave të Njeriut në Strasburg. Gjykata e njëjtë vendosi më vonë se shkarkimi i tij nga Orbani kishte shkelur të drejtat e tij themelore. Fidesz ka njoftuar bojkotimin e votimit, duke akuzuar qeverinë për “taktika autoritare”, pretendime që Tisza i ka mohuar.