Agjentët imobiliarë po ngrenë alarmin për rritjen e vazhdueshme të çmimeve të qirave në Shqipëri, duke identifikuar si faktor kryesor ekspansionin e platformave ndërkombëtare si Airbnb. Sipas të dhënave të AirDNA, deri në fund të marsit 2026, numri i njësive të listuara për qira ditore në vend arriti në 27 mijë, nga vetëm 3 mijë që ishin disa vite më parë. Nga këto, rreth 38 për qind ndodhen në Vlorë dhe Sarandë, ndërsa Tirana, Durrësi dhe Golemi renditen në pozitat e mëpasshme.

Ky zhvillim ka sjellë një rënie të ndjeshme të ofertës për strehim afatgjatë, pasi pronarët po preferojnë gjithnjë e më shumë modelin e qirasë ditore, i cili gjeneron të ardhura më të larta. Si pasojë, banorët rezidentë po përballen me vështirësi në gjetjen e banesave me çmime të përballueshme, sidomos në zonat urbane të kërkuara.

Dritan Leka, drejtues i agjencisë imobiliare “CPM”, thekson se shtrenjtimi i qirave nuk është produkt i një faktori të vetëm. Përveç Airbnb-së, rolin e tyre luajnë edhe rritja e kërkesës nga të huajt që zgjedhin të jetojnë në Shqipëri, kostot në rritje të ndërtimit dhe luhatjet e kursit të këmbimit të euros, i cili ka detyruar shumë pronarë të rishikojnë çmimet për të mbrojtur nivelin e të ardhurave.