Një fenomen gjithnjë e më i përhapur në Shtetet e Bashkuara po ngjall shqetësim në rradhët e konsumatorëve: shtimi i tarifave të fshehura në faturat e restoranteve, të njohura si “venue fee” ose tarifë ambienti. Bëhet fjalë për pagesa shtesë që klientët shpesh i zbulojnë vetëm pasi marrin llogarinë, pa qenë të njoftuar paraprakisht.

Rasti që ndezi debatin publik ndodhi në një restorant të Tampës, Florida, ku një kliente gjeti në faturë një tarifë prej 3% që nuk figuronte askund në menu. Stafi i lokalit pohoi se praktika po bëhet gjithnjë e më e zakonshme si mjet për të përballuar kostot operative në rritje, duke përfshirë qiranë, sigurimet dhe shpenzimet e mirëmbajtjes.

Si reagim ndaj kësaj situate, Florida ka miratuar një ligj që detyron restorantet të shfaqin qartë çdo tarifë shtesë në menu, në faqet e internetit dhe në faturë. Shembullin po e ndjekin edhe shtete të tjera si Kalifornia, Illinois dhe New York, duke ndërhyrë me masa ligjore kundër të ashtuquajturave “junk fees”. Qëllimi është garantimi i transparencës së plotë të çmimeve, duke u dhënë konsumatorëve mundësinë të dinë saktësisht sa do të paguajnë përpara se të ulen në tavolinë.