Portofoli i mikrokredisë në Shqipëri shënoi vitin e kaluar rënien e parë pas rreth një dekade rritjeje të pandërprerë. Sipas të dhënave të Bankës së Shqipërisë, vlera totale e huave të disbursura nga institucionet e licencuara për mikrokredi zbriti në 23 miliardë lekë në fund të vitit 2025, duke shënuar një tkurrje prej 4.6%, ose rreth 1.1 miliardë lekë krahasuar me një vit më parë.

Ekspertët e sektorit e lidhin këtë prirje kryesisht me shtrëngimin rregullator të ndërmarrë nga Banka Qendrore gjatë viteve të fundit. Një rol kyç luajti skandali që preku institucionet financiare jobanka Micro Credit Albania dhe Final, të cilat u bënë objekt i një çështjeje penale për shkelje në procesin e mbledhjes së kredive të këqija, duke dëmtuar imazhin e gjithë sektorit.

Në përgjigje, autoriteti monetar vendosi masa të reja që hynë në fuqi në fillim të vitit 2025, duke përfshirë kufizimin në dy kredi të njëkohshme për të njëjtin huamarrës dhe vendosjen e një tavani prej 60% për raportin e shërbimit të borxhit ndaj të ardhurave. Gjithashtu, norma maksimale efektive e interesit për kreditë deri në 200 mijë lekë ka shënuar ulje të ndjeshme, duke arritur në 51.37%, nga 171.41% që ishte në vitin 2022.