Kina po intensifikon kontrollin mbi pasuritë dhe të ardhurat që shtetasit e saj ruajnë jashtë kufijve, si pjesë e një strategjie më të gjerë për të rritur të ardhurat fiskale dhe për të frenuar daljen e kapitalit jashtë vendit.

Masat e reja tatimore synojnë trustet offshore, investimet në tregjet e huaja dhe produktet financiare të blera në Hong Kong. Individët do të paguajnë tatim prej 20 për qind mbi vlerën e aksioneve, pronave dhe aktiveve të transferuara në struktura jashtë vendit, si dhe mbi të ardhurat vjetore që këto struktura gjenerojnë. Autoritetet kanë kërkuar gjithashtu shlyerjen e detyrimeve tatimore të papaguara që nga janari 2023, duke përfshirë kamatëvonesa dhe gjoba.

Një element i rëndësishëm i reformës është zgjerimi i konceptit të rezidencës tatimore. Edhe qytetarët që kanë përfituar shtetësi ose leje qëndrimi jashtë Kinës mund të konsiderohen rezidentë tatimorë kinezë, nëse qendra e interesave të tyre ekonomike dhe familjare mbetet në vend.

Masat prekin drejtpërdrejt Hong Kongun, qendrën më të madhe globale të administrimit të pasurive ndërkufitare, me rreth 2.95 trilionë dollarë aktive. Aksionet e kompanive si Prudential, AIA dhe HSBC shënuan rënie të ndjeshme në bursë pas njoftimeve të autoriteteve kineze.