Drejtori i fabrikës ruse të dronëve ushtarakë Uraldrone, Vladimir Tkachuk, ka shpëtuar me jetë pas një atentati të kryer kundër tij, pasi automjeti në të cilin udhëtonte shpërtheu në fshatin Bolshoi Istok, rreth 25 kilometra larg Jekaterinburgut. Shoferi i mjetit ndërroi jetë në vendngjarje, ndërsa Tkachuk, i plagosur rëndë, u dërgua me urgjencë në spital, ku vazhdon të qëndrojë në gjendje kritike në Njësinë e Kujdesit Intensiv.

Burime të cituara nga Kommersant-Ural bëjnë të ditur se ngjarjen e ka shkaktuar një mjet shpërthyes i vendosur ose i aktivizuar brenda automjetit. Autoritetet ruse kanë nisur menjëherë hetimet, megjithatë asnjë konfirmim zyrtar nuk ka dalë ende lidhur me autorët apo motivin e sulmit.

Tkachuk qëndron në krye të Uraldrone, një ndër kompanitë më të rëndësishme të industrisë së mbrojtjes ruse, e cila prodhon dronin taktik Upyr FPV, të përdorur gjerësisht nga forcat ruse në konfliktin me Ukrainën. Atentati ndodh në një kontekst ku objektivat e lidhur me industrinë e mbrojtjes ruse janë bërë gjithnjë e më shpesh shënjestër e sulmeve dhe veprimeve të sabotimit.