Presidenti ukrainas Volodymyr Zelensky ka bërë me dije se Kievi qëndron i hapur ndaj çdo formati të mundshëm negociatash që mund të shërbejë si rrugë drejt një zgjidhjeje paqësore të luftës.

Gjatë një deklarate për mediat, Zelensky nënvizoi se dialogu me ekipin e presidentit amerikan Donald Trump vazhdon pa ndërprerje dhe se ky komunikim i rregullt me Uashingtonin ka vlerë strategjike për Kievin. “Jemi në kontakt të përditshëm me përfaqësuesit e presidentit Trump dhe kjo është e rëndësishme”, theksoi ai.

Lideri ukrainas shtoi se gjatë vizitës në Uashington bisedimet u përqendruan rreth vendosjes së kushteve të reja, të cilat do të hapnin rrugën për një proces të vërtetë diplomatik. Zelensky shprehu gjithashtu shpresën se figura të spikatura të administratës amerikane, si Steve Witkoff dhe Jared Kushner, do të intensifikojnë angazhimin e tyre diplomatik gjatë muajit gusht.

Presidenti ukrainas vuri në dukje se Kievi po zhvillon bashkëpunim të ngushtë edhe me partnerë të tjerë ndërkombëtarë, duke veçuar vendet e rajonit të Gjirit, të cilat sipas tij mund të kontribuojnë ndjeshëm si në mbështetjen diplomatike, ashtu edhe në nevojat e sigurisë së Ukrainës.