Tregu i pasurive të paluajtshme në Tiranë ka shënuar një rritje të ndjeshme të çmimeve gjatë shtatë viteve të fundit, me apartamentet që pothuajse i kanë dyfishuar vlerat në të gjitha njësitë administrative të kryeqytetit. Të dhënat e indeksit Keydata Albania tregojnë se rritja mesatare ka luhatur nga 85% deri në 151%, në varësi të zonës, duke krahasuar tremujorin e dytë të vitit 2019 me të njëjtën periudhë të vitit 2026.

Rritjen më të lartë e regjistroi Njësia Administrative nr. 6, që përfshin zona si Kombinati, Yzberishti dhe Sharrë, ku çmimet u shtrenjtuan me 151%, duke kaluar nga 672 në 1,687 euro/m². Ndërkohë, zonat e ish-Bllokut dhe Njësia nr. 10 mbeten ndër më të shtrenjtat, me çmime mesatare që arrijnë respektivisht 2,962 dhe 2,515 euro/m². Rritja më e ulët u regjistrua në Njësinë nr. 8, me 85%, ku çmimi mesatar arriti në 1,786 euro/m². Ekspertët e tregut vlerësojnë se ky trend pasqyron kërkesën e lartë, zhvillimin intensiv urban dhe rritjen e investimeve private në kryeqytet.