Tërmeti me magnitudë 4.7 që goditi zonën vullkanike të Campi Flegrei, pranë Napolit, ka lënë pas 21 të lënduar, dy prej të cilëve në gjendje kritike. Lëkundja u regjistrua rreth orës 19:46 dhe cilësohet si më e forta që ka përfshirë këtë rajon në katër dekadat e fundit. Pas goditjes kryesore, sizmografët regjistruan të paktën 30 pasgoditje me intensitet të ndryshëm, duke mbajtur banorët në gjendje alarmi.

Dëmet materiale janë të konsiderueshme. Në Pozzuoli, një pjesë e murit të një ndërtese në Via Pergolesi u shemb, ndërsa blloqe të mëdha guri rënë mbi automjete të parkuara. Njëzet e dy familje u detyruan të braktisin banesat e tyre pas shpalljes së tyre të pabanueshme, kurse shumë banorë të tjerë zgjodhën të kalonin natën në ambiente të hapura.

Autoritetet reaguan menjëherë. Prefekti i Napolit aktivizoi Qendrën e Koordinimit të Ndihmës, ndërsa Departamenti i Mbrojtjes Civile mblodhi Njësinë e Krizës. Trafiku hekurudhor në Napoli u pezullua për inspektime teknike, skela e Pozzuolit u dëmtua duke ndërprerë lidhjet detare me ishujt, dhe rreth 100 mijë familje mbetën pa energji elektrike për shkak të dëmtimit të një shtylle tensioni. Kryeministrja Giorgia Meloni po ndjek nga afër zhvillimet.