Komiteti i Helsinkit ka shprehur shqetësime serioze pas shoqërimeve të kryera nga policia gjatë protestës së zhvilluar përpara Parlamentit. Sipas përfaqësuesve të këtij organizmi, mënyra e shoqërimit të disa personave ngre pikëpyetje të rëndësishme, ndërsa vëmendje e veçantë i është kushtuar edhe kufizimit të lirisë së gazetarëve dhe statusit ligjor të protestuesve të ndaluar.

Ndër të shoqëruarit figurojnë aktivistë, gazetarë dhe Mirela Ruko, anëtare e Lëvizjes Bashkë, sipas burimeve të “News24”. Rasti që ka tërhequr më shumë vëmendje është ai i Ernest Ketës, i cili është shoqëruar nga policia ndërkohë që po merrte kujdes mjekësor në spital. Pas protestës, ai ishte dërguar për trajtim shëndetësor, por autoritetet e nxorën nga institucioni mjekësor dhe e morën në komisariat. Pas disa orësh, Keta u lirua.

Gazetarja Fatmira Nikolli e “News24” raportoi drejtpërdrejt deklaratat e Komitetit të Helsinkit, i cili ka kërkuar sqarime nga autoritetet mbi ligjshmërinë e veprimeve të ndërmarra gjatë kësaj proteste.