Agjencia e Administrimit të Pasurive të Sekuestruara dhe Konfiskuara (AAPSK) ka shënuar një rritje të konsiderueshme të të ardhurave nga qiradhënia e aseteve gjatë gjashtëmujorit të parë të vitit 2026. Sipas të dhënave zyrtare, në periudhën janar–qershor 2026, të ardhurat nga ky burim arritën në 131.5 milionë lekë, nga 99.8 milionë lekë që ishin regjistruar në të njëjtën periudhë të vitit të kaluar. Diferenca prej 31.7 milionë lekësh përfaqëson një rritje prej rreth 32 për qind në terma vjetorë.

Autoritetet e agjencisë e lidhin këtë performancë me një administrim më të organizuar të portofolit të pasurive, me zgjerimin e numrit të aseteve të dhëna me qira, si dhe me zbatimin e një strategjie që synon maksimizimin e vlerës ekonomike të pronave nën administrim. Të dhënat mujore tregojnë se trendi ka qenë i qëndrueshëm gjatë gjithë periudhës, me qershorin 2026 duke regjistruar rreth 22.9 milionë lekë, kundrejt 18.2 milionë lekëve në të njëjtin muaj të vitit 2025. Të ardhurat e gjeneruara mbështesin financimin e institucioneve ligjzbatuese dhe projekteve me interes publik.